الطلاق 11 مرة.. أزمة بين ميار الببلاوي وشيخ أزهري

أثار الشيخ محمد أبو بكر، أحد علماء الأزهر، غضب الفنانة ميار الببلاوي، بسبب تعليقه على حلقتها مع الإعلامية بسمة وهبة في رمضان، وحديثها عن عودتها لزوجها بعد طلاق 11 مرة. 

بداية الأزمة

نشر الشيخ محمد أبو بكر، عبر حسابه على “فيسبوك”، مقطع فيديو، بتاريخ 25 أبريل 2024، في تمام الساعة 12:52، تحدث فيه عن رأي وحكم الشرع فيما قالته الفنانة ميار الببلاوي بشأن عودتها لزوجها بعد الطلاق منه 11 مرة.

بدأ حديث “أبو بكر”، بانتقاد الأفلام والبرامج الفنية، قائلا: “الخطب والبرامج الدينية ممكن تشتغل ساعات طويلة، لكن ساعة واحدة من فيلم ممكن تهدم قيم أمة لـ30 سنة قدام”.

وتابع: “مكنتش حابب أتكلم، لكن بعد أن تكلمت الأخت ميار الببلاوي عن أنها اتطلقت من زوجها 11 مرة وكانت بترجع بمكالمة ولجأوا لمحلل، فهي أعادت للذاكرة فيلم عادل إمام اللي كان فيه دا، وبدأ الناس تتكلم، والبعض بدأ يحتال على الشرع ويلجأ لهذه الطريقة”.

وأضاف الشيخ: "إبراء لذمتي، الإسلام برئ مما قالته ميار الببلاوي شكلا وموضوعا، كلامها لا يمت للدين بصلة، ربنا جعل الطلاق 3 مرات مش 11 مرة، وجعل المرة الثالثة حاسمة وفاصلة”.

وتطرق في الحديث بالتأكيد على حكم الشرع في فكرة “المحلل”، قائلا: “هل ينفع لما يتطلقوا 3 مرات يرجعوا ويتفقوا مع واحد ويكتبوا على ورق؟، لا يمكن ذلك وهذا احتيال وزنا ولا يصلح، ولو اتجوزت وبيتت النية إنها تزهق الراجل ده علشان يطلقها فلا يصلح”.

واستند أبوبكر في فتواه لقول النبي صلى الله عليه وسلم: “لعن الله المُحلل والمحلل له"، "يعني مطرودين من رحمة ربنا، يعني اللي اتجوزها باتفاق ملعون، واللي قاعد مستنيها ملعون من رحمة الله”.

وفي السياق ذاته، استطرد قائلا: “الزواج باطل يا ست ميار والرجوع باطل يا ست ميار، ومعندناش طلاق في الإسلام اسمه 11 مرة ومعندناش حاجة اسمها تحليل، لكن عندنا زواج شرعي، إن عاش معها بالمعروف وإلا فيفارقها بالإحسان، ومعندناش حاجة اسمها ترجع بمكالمة تليفون”.

ميار الببلاوي ترد على اتهامها 

خرجت الفنانة ميار الببلاوي، مساء أمس في بث مباشر عبر "فيسبوك"، وكشفت لجمهورها تفاصيل ما حدث معها، وعرضت قسائم زواجها، قائلة إنها لم تفعل أي شيء يغضب الله.

كواليس مقابلة ميار مع الشيخ 

أضافت: “ربنا بيقول «يا أيها الذين آمنوا إن جاءكم فاسق بنبأ فتبينوا»، فما بالكم إن اللي قال عني كده شيخ جليل ويخوض في عرضي وشرفي رغم أن كلنا بنحبه وبنسمع كلامه، وأول ما شيخنا الجليل شافني وأنا كنت بحبه جدا وبتابعه وأقول نفسي يكون معايا في حلقة، وسلمت عليه وقالي إنتي جيالي علشان حطيتك على المرجيحة امبارح، فقلت له مش فاهمة، فقال لي أصل إمبارح كنت جاي عليكي جامد، فرديت قلت له شرف ليا وأنت عمرك ما هتظلمني ونحسبك على خير، لقيته بيقولي إيه اللي إنتي قولتيه مع بسمة، لكن ما محدش فكر أنه معمول مونتاج علشان يطلع تريند ونص الكلام مقطوع”.

اتهام يلاحق ميار الببلاوي

أشارت الببلاوي، إلى أن الشيخ اتهمها في عرضها، موضحة: "لما سمعت الفيديو لقيته بيقول عليا إني باخد كل راجل ليلتين وإني ببوظ شكل الدين، حسبي الله ونعم الوكيل فيك زي ما اتكلمت في عرضي وشرفي وشرف ابني، حرام عليك سبت التمثيل وكل حاجة وبشتغل في برنامجي وبين صلاتي وبيتي وتربية ابني ومش عايشة ومش بخرج من بيتي إلا لو شغلي يعني دفن نفسي مع أمي".

ولفتت ميار الببلاوي إلى أن أزمتها بدأت بعد حلقتها في برنامج “العرافة”، بتاريخ 31 مارس، و1 أبريل، قائله: "محدش فكر أني ابني راجل وابني في وسط الرجالة وصحابوا وشغله شكله هيكون إيه، وابني مش بيكلمني من 22 رمضان من وقت ما الحلقة طلعت وقافل على نفسه أوضته ومش بيكلمني وأنا مطلعتش غير بابني”.

مونتاج حلقة ميار الببلاوي

واختتمت حديثها: "كمية المونتاج اللي معمولة في الحلقة فوق ما تتخيلوا، والحلقة اتذاعت وياما حاجات بتنزل وتعدي ووقتها كنا في رمضان ومعنديش استعداد أبص لحاجة ولا أضيع صلاتي وأنا بخاف من ربنا بشكل مش طبيعي".