A . .A

الست "أم صابر"

ولدت فى دنشواى بالمنوفية.. وهى عندها 7 سنين شافت بعينيها أبوها وعمها متعلقين على مشانق الإنجليز بعد محاكمة هزلية واتهام باطل وظالم من الإمبراطورية التى لا تغيب عنها الشمس بأنهم قتلوا اتنين من ظباط الإنجليز كانوا بيصطادوا حمام فى دنشواى فولعوا فى القمح وقتلوا سيدة مصرية ومن جبنهم وخوفهم ومن الجرى وشدة الحر ماتوا بضربة شمس.

"اسمع منى" النهاردة حكاية الست أم صابر.. المصرية الأصيلة.. اللى كرمها الرئيس جمال عبدالناصر ولحد النهاردة فيه قرية بإسمها بمركز بدر بمديرية التحرير بمحافظة البحيرة... وكمان فيه مدرسة يإسمها "الشهيدة أم صابر " فى منطقة الحضرة بالإسكندرية.

مين هى بقى الست أم صابر وإيه هى حكايتها؟.. فلاحة مصرية اسمها الحقيقى فاطمة وهبت حياتها لمصر وللدفاع عن بلدها.. اتجوزت ابن عمها الشيخ إبراهيم الأزهرى.. واتنقلوا من دنشواى وعاشوا فى كفر عبده فى السويس.

زوجها وإبن عمها وهو صغير شاف هو كمان الإنجليز بيشنقوا أبوه وعمه.. ففضل لآخر يوم من عمره واهب حياته للدفاع عن بلده.. بيقاوم الإنجليز فى القناة وبيته مفتوح لكل الفدائيين اللى كانوا بيستخدموه كمخزن سلاح.. ولأنه قريب من معسكرات الإنجليز كان الفدائيين بعد كل عملية الأرض بتتشق وتبلعهم والإنجليز يفتشوا عنهم فى كل مكان.. وعمرهم ما قبضوا على حد فيهم.. وده لأن الشيخ إبراهيم الأزهرى كان مجهز سراديب فى بيته بيدخلوها ويختفوا.. يفضل الإنجليز مراقبين البيت ويفتشوه بدل المرة 100 مرة.. ومايلاقوش حد.. فى الوقت ده الست فاطمة كانت بتتكفل بكل أكلهم وشراء اللى يحتاجوه وبتنقل الرسايل منهم وليهم.. لحد ما الدنيا تهدى يخرجوا فى أمان.

فى سنة 1941 اتقبض على جوزها وزى ما الإنجليز لفقوا لأبوه التهمة.. وجهوا له 100 تهمة وتهمة ظلم.. واتحكم عليه بالإعدام.. وقتها كانت الست فاطمة حامل.. فوصاها جوزها تربى ابنها على حب البلد وكره الإنجليز ومقاومتهم.. ويوم ما اتعدم الشيخ إبراهيم اتولد ابنه صابر.. وبقت الست فاطمة مشهورة بأم صابر.

هل اتوقفت أم صابر عن الكفاح وقالت اربى ابنى فى هدوء ولما يكبر يبقى يقاوم الإنجليز مع الفدائيين؟

"اسمع منى".. رغم حملات التفتيش على كل بيوت كفر عبده ليل نهار من الإنجليز .. "أم صابر" فضل بيتها مفتوح للفدائيين ودلتهم كمان على مخازن السلاح والذخيرة السرية اللى ماحدش كان يعرف مكانها غيرها هى وجوزها .. وبقوا يوصلوا البيت ياخدوا السلاح ويهاجموا معسكرات الإنجليز ويرجعوا على السراديب لحد ما الدنيا تهدى .

الست العظيمة أم صابر .. ما اكتفتش بالدور اللى بتعمله وشاركت كمان فى تهريب السلاح للفدائيين وكانت بتروح تستلم السلاح والذخيرة ... وفضلت كده لحد سنة 1951 .. وقتها كانت راجعة فى الأتوبيس ومعاها ركاب كتير معاهم سلاح وذخيرة للفدائيين ..شافت كمين انجليزى واقف يفتش الناس فسلمت الذخيرة اللى معاها لواحدة جنبها وقررت تضحى بنفسها وتديهم فرصة يهربوا من الكمين ... نزلت أول واحدة من الإتوبيس ورفضت التفتيش وصوتها بقا عالى جدا وقالت للظابط الإنجليزى ايديكم نجسة ومش هسمح لحد فيكم يلمسنى .. وسابته وجريت فجريوا وراها وضربوها بالنار .. سقطت الست أم صابر شهيدة وقدر باقى الناس تفلت وتوصل السلاح والذخيرة للفدائيين ... وبقت أم صابر أول سيدة شهيدة مصرية في الإسماعيلية ومنطقة القناة كلها في الوقت ده .

بعد ثورة 23 يوليو 1952 ..الدولة المصرية قررت تكرم الست "أم صابر" وبأوامر من الرئيس الراحل جمال عبدالناصر ،تم اطلاق اسمها على قرية فى البحيرة ومدارس كتير فى قرى مصر ومدرسة فى اسكندرية .

الخلاصة فى كلمتين زى ما عودتكم "الست أم صابر" زى ستات كتير .. سجلت اسمها بحروف من نور فى صفحة تاريخ المرأة المصرية الأصيلة وكفاحها دفاعا عن بلدها .

على مخازن السلاح والذخيرة السرية اللى ماحدش كان يعرف مكانها غيرها هى وجوزها .. وبقوا يوصلوا البيت ياخدوا السلاح ويهاجموا معسكرات الإنجليز ويرجعوا على السراديب لحد ما الدنيا تهدى .

الخلاصة فى كلمتين زى ما عودتكم "الست أم صابر" زى ستات كتير .. سجلت اسمها بحروف من نور فى صفحة تاريخ المرأة المصرية الأصيلة وكفاحها دفاعا عن بلدها