A . .A

الست "نعيمة"

"امشى جنب الحيط.. ومن خاف سلم"... تفتكر فعلا اللي خاف سلم.. وأن المشى جنب الحيط ممكن يوصلك لأي نتيجة؟
حكايتنا النهارده عن "ست" مصرية أصيلة.. قررت ماتمشيش جنب الحيط.. ولا تستسلم لعادات وتقاليد بتقول إن البنت مالهاش غير بيتها وجوزها وولادها.
حكايتنا عن أول محامية مصرية.. الست “نعيمة الأيوبي”.. بنت قوية جيناتها كلها إرادة وعزيمة.. يمكن نعيمة أول بنت فعلا يتقال لها البنت زي الولد مش كمالة عدد.
كل سنة البنات اللي نجحوا في الثانوية العامة السنة ودخلوا الجامعة المفروض يقفوا على باب الجامعة ويدعوا ويقرأوا الفاتحة للست نعيمة ورفيقاتها اللي خاضوا التجربة الأولى وتحملوا كثيرا لتتعلم البنات في الجاحمة.
اوعوا تفتكروا أن الطريق للجامعة ده كان سهل.. وأنتم داخلين الجامعة عايزاكم تقروا الفاتحة على روح "نعيمة الأيوبي" .. وقدام باب الجامعة اقفوا وأدعوا كمان لـ الآنسة فاطمة سالم، السيدة زهيرة عبدالعزيز والدكتورة سهير القلعاوى، والسيدة فاطمة فهمي.
دول أول خمس بنات مصريات راحوا الجامعة.. ووقتها الدنيا اتقلبت لدرجة انهم لما اتخرجوا اتحطت صورتهم صفحة أولى في جريدة الأهرام وكأنه حدث نادر.. وهو فعلا كان حدث نادر.
الست نعيمة الأيوبي، من 90 سنة اتخرجت في كلية الحقوق.. ودي كانت معجزة في حد ذاتها.. أن بنت مصرية تتعلم لحد ما تتخرج من كلية الحقوق..
"الست نعيمة" في الظاهر بنت ثرية.. أبوها معاه فلوس كتير وقدر يعلمها.. ووفر لها كل حاجة.. والشايع وقتها أن البنت هيجي لها عريس من طبقتها الغنية ياخدها تعيش في بيت زي بيت أبوها وتبقى زوجة وأم لأولاد وبنات.. الأولاد يروحوا المدرسة والبنات في البيت في انتظار عريس.. دايرة مفرغة مالهاش نهاية.
"الست نعيمة" في الباطن امتلكت إرادة حديدية.. قررت تحط نهاية للدايرة دي.. كملت تعليمها وكانت من أول خمس بنات دخلوا الجامعة.. أول خمسة فتحوا للبنات كلها الباب.. علشان النهارده يدخلوا ببساطة ويتعلموا ويتفوقوا ويتولوا كل المناصب.
الست "نعيمة" دخلت مدرسة محرم بك بالإسكندرية، وأصرت على استكمال تعليمها فأرسلها والدها للدراسة في مدرسة الحلمية الجديدة بالقاهرة للحصول على الشهادة الثانوية.
" الست نعيمة الأيوبي" بتقول في مذكراتها أن حلمها بالجامعة والعمل بالمحاماة فضل يطاردها من وهي صغيرة عندما رأت عمها المحامي الكبير يرتدي روب المحاماه وبيدافع عن الناس... القدوة مهمة جدا للبنات والأولاد في السن الصغيرة.. فخلوا بالكم وكونوا قدوة لأولادكم..
دخول الست "نعيمة" الجامعة ماكانش سهل.. ولولا طه حسين وإيمانه بتعليم المرأة ماكناش عرفنا ولا واحدة من الخمسة دول.. وقتها قال لهم ماتجيبوش سيرة إنكم قدمتم في الجامعة.. خلوا الموضوع في السر لحد ما نقبلكم وتبقوا طلبة علشان أقدر أدافع عنكم قدام اللي عاملين نفسهم حماة الفضيلة والتقاليد وعايزين يجبروا البنت أنها تفضل جاهلة وفي البيت.
وفعلا بعد قبولهم في الجامعة.. الدنيا اتقلبت وطلع ناس زي اللي بيطلعوا لنا اليومين دول يقولوا إزاي البنت تتعلم.. لازم البنت ترجع تقعد في البيت.
"الست نعيمة الأيوبي" حققت حلمها وأصبحت أول فتاة مصرية تحصل على ليسانس.. لكن فضل الجزء التاني من الحلم.. إزاي تبقى محامية والنقابة بتسجل أسماء المحامين الرجال فقط.
الست "نعيمة" رفعت قضية على النقابة وأخدت حكم بأحقيتها في تسجيل اسمها وبقت أول محامية مصرية.
مش قلت لكم.. العزيمة والإصرار جينات مصرية أصيلة.. مش قلت لكم إن الست نعيمة الأيوبي والبنات الخمسة اللي فتحوا باب الجامعة لكل الستات يستحقوا يتقال عليهم “الست”.